هو ما راح يقلك أنا بعهد الرئيس صار عندي كذا بيت و فيلا وصانعة فيليبينية لابني الصغير، ولا راح يقلك كام سيارة صار مغير . ولا راح يقلك شي عن الأراضي والحسابات ببنوك برا. وطبعا ما راح يحكيلك عن معاملاتو يلي بتمشي بتلفون لما غيرو بيموت وبيعيش ليعمل نفس المعاملة ، ولا راح يخبرك كيف لما بيروح ياخد قرض بيشرب فنجان قهوة مع المدير لبين ما يخلصولو شغلتو الموظفين . و لا راح يبوح لك انو عمرو ما دفع ضريبة وعندو أصحاب اثنين مسئولين بيجو بياكلو عندو واذا ما عشاهم بالبيت بياخدهم على أحلى مطعم وكيف بيكون إحساسو جميل لما الغراسنة بيضربولهم سلام. ولا راح يقلك انو ابنو خدم عسكريتو عندو بالشركة وانو مرتو لما بترجع بالمطار ما حدا بيفتشلها شنطة. ولا راح يقلك كيف تضاعفت أموالو كذا مرة ولا كيف رست عليه المناقصات و كيف..وكيف ..ولا كلمة من هدول راح يقلك
..
هو راح يقلك:يا أخي مالنا غير هادا النظام ، هلق يروح بيجوا الاسلاميين وهدول كارثة عالبلد.. أو ممكن يقلك :يا أخي هي مؤامرة دولية على سورية لانها صامدة بوجه اسرائيل، وأميركا بدها تقسم البلد ..الله وكيلك اذا لا سمح الله طار الرئيس بدهم يدبحوا الأقليات ونصير متل العراق وأفغانستان.. واذا حس أنك عم تشك بكلامو بيقول: أنا والله ما عم دافع عن النظام ، أنا ضدو متلك ؛؛بس عنا أحسن منو شي؟ بعدين الفساد موجود وين ما كان ، ليش بكندا وأميركا ما في فساد؟ هلق وقفت على رامي مخلوف يعني ؟ وكتير ممكن يضيف : طيب هلق الرئيس عطاهم حرية احزاب ورفع حالة الطواريء ، شو بدهم أكتر من هيك؟بدهم يخربوا البلد يعني ؟ بعدين هدول المتظاهرين روح شوف قديش كل واحد منهم قابض مصاري لحتى ينزل مظاهرة؟ بعدين أنت شفت أشكال المتظاهرين ، هلق هدول بدهم يحكمونا؟
..
اذا ألك نفس تجاوبو قلو :
ولك يخرب بيتك وين شفت رفع لحالة الطوارىء والأعتقالات ما وقفت دقيقة؟وين شفت صمود ضد اسرائيل اللي عم تبني كل يوم مستوطنات من أربعين سنة بالجولان وبفلسطين و رئيسك ما طلع معو شي؟ مين كان مانعنا ندبح بعضنا قبل ما يجي الأسد و أبوه؟ بعدين فساد رامي له متيل؟ أو في دولة بالعالم بتروح مداخيل البترول عالقصر بدون ما تدخل بالموازنة؟
ما حدا خرب البلد من أربعين سنة غير أمثالك أنت و رئيسك يلي عم تدافع عنو، وهدول المتظاهرين ما في أشرف منهم، وما حدا بالعالم بيقبض مصاري ليطلع يموت، أو يتصاوب أو ينشل أو يتعرض للتعذيب . والناس بكل بلاد الأرض عم تحيي و تنحني لشجاعة هالشعب البطل. حاجتك كذب وتبريرات ..
..
هادا اذا ألك نفس تجاوبو