كتبت منال خميس : الى الذين انشغلوا علينا في كل العالم : نعرف نحن ابناء قطاع غزة أنكم انشغلتم بنا وعلينا لمدة 22 يوماً بالتمام والكمال، وما زال بالكم مشغولاً تفكرون ببقايانا، أقصد بمن وبما تبقى منا، وتعتصرون افكاركم ومقدراتكم لحل قضيتنا ومساعدتنا، نشكركم جميعاً ونخبركم أنه لا داعي لقلقكم أكثر، فـ (احنا بخير). كما نقول لكم اننا انتصرنا (كماأخبرتنا المقاومة) وتلك الحرب ضدنا كانت تافهة جداً (رأينا الشخصي)، فماذا يعني ان يقتل منا 1250 شخصاً ويجرح ما يقارب 6000 آخرين واغلبهم سيلتحق برتل الشهداء، ومن تبقى سترافقه كصديقة اعاقة او تشوهات دائمة، وهذا لا يضيرـ فنحن شعب الجبارين، فماذا ان تدمرت المدينة، ومنازلنا هدمت علينا، وماذا ان جعنا على مدار العشرينية الماضية، وماذا يعني اننا ما زلنا بلا ماء ولا كهرباء ولا غاز طهي، فقد اصبحنا نطبخ ونخبز على النار، وماذا اذا نزح اغلب السكان من كل انحاء القطاع الى مدارس وكالة الغوث، فهي هجرة داخلية وبروفة يجب ان نشهدها نحن ابناء الـ 2009 لأنها فاتتنا متعة وشرف المشاركة في هجرات الـ 67 والـ 48 السابقتين. وأرجو الآن ان تعذروني لأني سأكمل خطابي بلهجتنا العامية الفلسطينية، لأن الفصحى تعيق تقدمي في سرد ما أرغب اخباركم به وفي نقل ما جرى. بالواقع ما وصلكم من أخبار وصور على الفضائيات هو على سبيل التهويل لا أقل ولا أكثر، وفي سبيل الحصول على اسبقيات صحافية في نقل الألم والدم والدموع، للحصول على تعاطف شعبي معنا، فكل ما حدث وبالحسبة البسيطة أراه لا يستحق ان نشغلكم معنا وعلينا به على مدار 22 يوما ، تبكون وتتظاهرون وتعاندون حكامكم، وسمعنا ان شاباً من تركيا احرق نفسه احتجاجاً على الحرب ضدنا، وفتاة سعودية ألغت مراسم عرسها حزناً علينا، بالواقع انتم الشعوب والفضائيات هولتم الأمور جداً وأنا بالنيابة عن نفسي فقط لا غير قررت رحمة بكم وبعيونكم ودموعكم وحبر كتابكم وأقلامهم أن اوضح لكم حقيقة ما جرى بكل بساطة وأنقل لكم رأيي الشخصي. أولاً وبصراحة اتساءل ماذا يعني اذا جارتنا ايمان اغمى عليها عدة ايام لأن علاجها خلص ومش موجود بالصيدليات. هل انهدت الدنيا؟ وشو يعني اذا قصفتنا اسرائيل بقنابل الفسفور وكل انواع الغاز وكل المحرمات دوليا، كل ما حدث ان بعض الاجساد تشوهت واخرى انحرقت وبعضها اختفت ملامحها نهائياً، ارجوكم لا تكبروا الامور، ماذا في ذلك؟ فنحن طيلة عمرنا حقول تجارب لخطط وبرامج وأسلحة الآخرين فلماذا نحتج هذه المرّة، وشو فيها اذا جربوا علينا سلاح جديد؟ أرى ان هذا كله من صغائر الأمور ونحمد الله انهم لم يستمعوا لنصيحة ليبرمان ورمونا بقنبلة ذرية. حسين مات. ومات أكرم وخالد، وأبو صلاح مات، وماتت مرته. أبو توفيق مات وكمان ابنه ومرته. ومحمد إبراهيم مات وماتت أمه. إسحاق مات وناصر مات. وماتت زوجة نائل ومات عاهد وغسان وجابر. ومات نصر. وخليل مات. وكمان شعبان واولاد عمه الثلاثة ماتوا ..عيلة الداية ماتت. وعيلة السموني ماتت وعيلة ابو عيشة ماتت كمان وابو وسام ابنه مات بحضنه بالمستشفى ..ناس كثير ماتت أكثر من ألف ومائتين .. اشي قتلته اليهود واشي قتلوهم ناس تانيين، شو يعني اذا كل هالناس ماتت، كل ما في الأمر انهم اذا كانوا الآباء راح يغيبوا عن بيوتهم ومش راح يشوفوهم اولادهم تاني، واذا كانوا صغار مش راح يروحوا على مدارسهم أو يطلبوا حليب ومصروف، واذا كانوا أمهات ما راح يطعموا او يرضعوا اولادهم، مش مهم كل هذه تفاصيل صغيرة، البني آدمين بغزة كتار، والحمدلله ربنا مكثر اهل الخير والجمعيات الحقوقية والانسانية والخيرية اللي راح تتبنى الجميع .. وبعدين خلونا واقعيين شوي، كل الرؤساء بيموتوا لاجل شعوبهم شو فيها لما عندنا الشعب يموت لأجل قياداته، وليش يستكتر علينا العالم التضحية والموت لأجل قياداتنا المتخندقة ومقاومتنا المتبدرمة؟مهمّه كمان تعذبوا لما عملوا مؤتمرات وخطب ليدعموا صمودنا. وقالوا لنا الصبر ساعة، واحنا صبرنا ساعات، ونلنا النصر وتحقق الوعد ..الحمدلله انها مقاومتنا وقيادتنا الحكيمة الذكية بخير. وهيها انسحبت اسرائيل. قصدي اوقفت اطلاق النار وضلت بعيدة شوي عند الحدود. حمزة ابن جارتنا نادية مفقود وام حسام دفنوا اشلاء اكتشفوا انها مش لابنهم، لقوا ابنها في العناية المركزة وجهه سايح بلا ملامح..واللي اندفنت اشلاؤه تعرفوا اهله عليه، نارهم بردت بعض الشيء، على الأقل لقوه، فرحوا لأنه شهيد، وكثير ناس مثلهم، ألا تساوي هذه الفرحة عذاب الـ 22 يوم؟وبعدين انعام زوجة جمال ولدت ولد سمته حمزة، شايفين ربنا بيعوض على طول احنا مش زعلانين. بس يمكن ماخدين شوي ع خاطرنا لانه زوجة حمزة بعدها صغيرة يا حرام ومتعلقة فيه كتير وموتت حالها بكا عليه. بس بنرجع بنقول امرها لله حالها متل حال غيرها اللي فقدوا ازواجهن، أمر الله شو بدنا نعمل. كمان في كثير ناس غير حمزة مفقودين، وشو يعني مفقودين، مش قصة. هدول بيكونوا يا ميتين يا مجروحين يا محبوسين واللي طلع مصيره يرجع، والمستشفيات بتقول انه فيه بالثلاجات شهداء كثير ما حدا عارفهم ، اللي ابنه مفقود يفتش عليه بالثلاجات، كمان في شباب اسرائيل اعتقلتهم، وكمان كتير بيقولوا الناس انهم شافوا ناس بتدفن قتلى بالسر بقبور جماعية. ومش عارفين ليش. وفي كثير ناس جثثهم ما زالت تحت الانقاض، بس الحمدلله طلعوا الناس اليوم ينتشلوهم، انتشلوا لحتى الآن 40 جثة من جبل الكاشف والعطاطرة وحي الزيتون، ولسه النهار بأوله، أكيد راح يطلعوا جثث كمان من نفس المكان ومن اماكن تانية بكل انحاء القطاع. الصحيح أنا بعدنا ما عرفنا هوياتهم الشهداء اللي طلعوهم من تحت الانقاض ومش مهم هذا كله، فالهويات كتيرة والاسماء كتيرة، بس يا حرام الناس بتقول انه كل البيوت المنسوفة والمقصوفة بتطلع من تحتها ريحة أموات، يعني مسألة وقت ويطلعوا الكل. وتتغير ريحة المكان، طبعا مش مهم هذا كله تفاصيل صغيرة لانها كل الدنيا بتتغير ما راح تيجي ع ريحة مكان صار مقبرة للاموات بعد ما كان بيت يسكنوه احياء. بعدين ما بتفرق لانها اسرائيل مثل ما قصفت البيوت وهدتها ع اصحابها، قصفت المقابر كمان واختلط التراب بالعظم باللحم مش مهم كله بيتعوض طول ماحنا عايشين، مين عارف يمكن يجي اشي اقوى ينسينا، متل ما نسينا انه في كثير ناس انقتلت وقت صارالانقلاب بغزة. اذا حدا بيتذكر. يا جماعة احنا بخير، جيش اولمرت انسحب بفضل المقاومة، انشالله ربنا يستر عرضها المقاومة، ويسترعلينا وعلى كل خلقه، وهذا الانسحاب فرصة نبحث فيها عن الشهداء تحت الانقاض وفي الثلاجات ونتفقد الجرحى في المستشفيات، اللي اتصاوبوا من اليهود ومن غير اليهود لأنه (الناس حكيها كتير وبتقول انه في ناس ما بتقدر تطلع من بيوتها)، ونشوف اسماء اللي حبستهم اسرائيل، ونعيد بناء البيوت، ونركض للحصول على المساعدات، وفرصة نعالج روسنا من الصداع من صوت المدفعية والطيران وقلة النوم، كل اللي صار مش مهم كل شيء له علاج، وفرصة كمان نفتش على ماء علشان نتحمم، بصراحة تعفنا وفرصة نفوت الحمام براحتنا بعد ما كنا نخاف نفوته لننقصف ونموت مش مستورين، وبعدين صار قدامنا وقت كثير للولولة وفتح الملاطم والبكاء أمام الفضائيات، وأمام المذيعات الملونات، وقرايبنا بكل مكان يتفرجوا علينا، وفرصة المؤسسات الدولية والمؤسسات المانحة والمؤسسات الاهليه يقيموا الوضع، وينشطوا ويعدوا برامجهم الضخمة لدعمنا مادياً ونفسياً واجتماعيا ...الخ انا بطمنكم احنا بخير وهيهم العرب عملوا قمة خليجية باسمنا (غزة) الصراحة اللي شافته غزة من شهرة عمرها ما حلمت فيها، من اكتر من سنة وجاي شغلة العالم كلها غزة، ونرجع للقمة الخليجية اللي احنا بصراحة مش فاهمين طبختها وين وكيف وليش، بس كثر الله خيرهم اخوتنا العرب ويجبر خاطرهم، ع الأقل تذكرونا وسافروا وراحوا وأجوا وتعبواعلشان يدعمونا. ويحكوا عنا كلام منيح. قالوه وروحوا كل واحد ع بلده وكان الله بالسر عليم. والصراحة الحرب هذه اجمل ما فيها انها وحدت الكل، مش بالفكرة لا، وحدت المصيبة، ما في بيت الا انقصف ولا في بيت الا مات فيه حدا، القتل فينا وحد الوجوه ووحد الملامح، ووحد اللغة والكلمات وكلنا صرنا بس نشوف الكاميرات نقول الله واكبر، وحسبي الله ونعم الوكيل. وكمان القصف والحرب خلتنا انسانيين اكتر، كنا نضل طول الليل سهرانين نبعت مسجات جوال لبعض، واللي برا يخففوا عنا، الصحيح ما كنا لوحدنا ابداً، الشاعر يوسف القدرة كان دايما صاحي، يرد بسرعة، ومنير كمان، والشاعر احمد زرزور، والشاعرة فاطمة ناعوت بمصر، والشاعر سامح كعوش بالامارات و اماني دايما صاحية، وعلوش الشجاع دايما صاحية، وخايفة، والشاعرة يسرا الخطيب دايما صاحية، ونضال، وعماد، وسناء لهب، وكفاح بنت عمي، وفيرلي ببلجيكا وأكاتيا بايطاليا، و سولارا الصباح بكندا، وخداش والهيجاوي وعدنان الصباح، وطارق الكرمي، وعبدالسلام العطاري، وناصر عطالله، وجيهان وحمدي وجمال واحسان، وبلو سكاي، ابو شفيق وابو يوسف وسمير وناس كتير بيتصلوا ويبعتوا مسجات طول الليل. ليتطمنوا علينا ونتطمن عليهم. وللعلم المسجات لو بدنا نجمعها بتنفع كتاب يوثق سيرة الحرب سأسرد بعضها لتعرفوا اننا اقوياء ونستطيع ان نخلق مليون اسلوب يعيننا على ليل الحرب الطويل. (شو اخباركم ؟احنا كويسين، بس الوضع زي الزفت، كيف الوضع عندكم..صابرين). ( الله يرحمنا ويتكفل بنا ويشرق شمسه علينا، لشو كل هالقتل الي بيصير؟...يوسف ) (مرحبا اجا لعمي جمال ولد سماه حمزة،ع اسم جارنا اللي انفقد قبل اسبوع .. خميس) (لا تخافي الله كبير) (طمنيني عليكي بليز) (منال طمنونا عليكن عمجرب اتصل وما بيعلق ، الله يحميكن، ويكون معكن، انتبهوا ..سامح كعوش) (مسا الخير احنا اخلينا بيتنا لأنه انقصف هلا بالروضة انا واهلي واخواتي رني ع الروضة ضاع بالبيت رقمك الارضي...نعمة ) (انشالله تكوني بخير بعد قصف أمس، انت والعائلة الله يبعد عنكم الشر..مرفت ) (اخلينا البيت شبابيكنا تكسروا لما نسفوا بيت جنبنا .. احنا بخير، كيف انتو..يسرا) (البقية بحياتك، بعتلك فلوس لمرت الشهيد وصلوكي؟...) (سهران بقلي بطاطا ع البابور..العمار)(مرتي جابت بنت سميناها تحرير..علي) (مسا الخير، بشوف الوضع هادي ..جمال) (وصلتك الامانة ؟..حمدي) (الحمد لله كلنا بخير..حسين استشهد امبارح..اسمهان) (حاسة اني خايفة كتير ومش ع حالي،ع الناس اللي بحبهم، وخايفة اكثر ع محمد لو صرلي اشي .. علا.علوش الشجاع ) (صباح الفل يا ماما الساعه 3 الفجر مش عارفه انام، كل يوم أسوأ من اللي قبله، أصعب احساس ممكن يواجهه الانسان، هو الضياع أو انتظار الموت، صرنا بندفع ثمن غلط غيرنا بهالبلد.. علا .علوش الضعيف) (طيب لو سمحتي بعيد عن هادي التفاصيل اللي بتحكيها برايك مطولين؟قصدي متى الاحتفال بالنصر ومتى راح نتسلم دعوات من....و... ،أماني) (وضعي الصحي صعب جداً، والمكان اللي انا فيه فش ارسال بصعوبة ببعت...ابو قصي) (الأمن الدولي يصدر القرار1860 يقضي بوقف اطلاق النار وانسحاب جيش اسرائيل من غزة واسرائيل حلقت لنا..نضال) (أولمرت :العملية مفتوحة ليوم القيامة..منال) (مرحبا كيفك احنا بخير بس اليهود ع راس الشارع ومحاصرينا ربنا يستر..ايمان) (كلنا بخير ولكن اخلينا البيت ارجو ان تكونوا جميعا بخير..سمير) (يا رب تحفظ منول وأسرتها وغزة كلها، أنتم جميعا في روحي..احمد ) (كيفك طمنيني ..سالم) (كان علاء بدو يحكي معك قبل ما يدخل غرفة العمليات.اتصاوب براسه.. انا نص ساعه وجاي. محمد. معيش رصيد ببعتلك من جوال علاء). (how are u wesee horrible pictures on television!hope u re ok..big kisses from Veerle andgunther and gus) ( بل هي المؤتمر نفسه ..عماد) (حاضر على راسي بس تيجي الكهربا..ابو يوسف). (هذه ضريبة المقاومة والصمود..ابو شفيق) (كل القصف حوالينا 3 ايام ما نمت بخاف انام..كيفك انتي يا رب تكوني بخير..اماني) (I m trying to callu but I cant get the line I m very worried about u… solara ) هكذا مع رسائل الجوال والاحاديث العائلية والصلاة وشموع تضيء ليل الحرب الطويل، والقهوة، والراديو الصغير، وبرد برد برد كتير..نرجو الا تقلقوا علينا في حرب اخرى، قد تأتي ، أو ربما تتراجع اسرائيل في كلامها وتعود لتستكمل هذه الحرب بأية حال..يا كل العالم .. احنا بخير.
أشهد أن لا حواء إلا أنت، وإنني رسول الحب إليك.. الحمد لك رسولة للحب، وملهمة للعطاء، وأشهد أن لا أمرأة إلا أنت.. وأنك مالكة ليوم العشق، وأنني معك أشهق، وبك أهيم.إهديني...
