خاص ألف

يا هلي وطيّب هواكم

جنت أغفه ابسد صرايفكم وفيكم

وجنت اذوب اويه الفرح والشوكَــ/

يا عيني الفرحكم

جنت من اعطش أفوج ابمي نهركم

جنت يوميّه الصبح أقره ابسلفكم

اهناك

من أكَضي القرايه/ ألعب اويه السنبله اللفّتني لف

ولن بنات السلف كلهن

ألعب اوياهن

وأطرّز بالضفاير شوكَنه ومحّد عرف

صرت أحبّ اهواي صاحبتي جميله

وصارن اكَصايبها يلتمّن كَمر فوكَـ السلف

ومن فُرحنه احنه ابهوانه

فاض شاطينه حنين وما نشف

ومن يطكَـّ الورد بديار السلف

إتصير صاحبتي جميله/

سنبله او ورده وغزال

تفرش اكَصايبها مرّه

وتعتلكَـ مثل الهلال

وجنت من اتلولح ابطولي يلفلفني الشريط

وجنت اشوف ابعينها الوسعه خيال

مرّه من مرّه كَعدنه ابفي حديقه

وهبّت اعلينه نسايم ريح وامحبّه ودلال

كبرت ابعيني جميله

وصارت آمالي جميله

وشوكَها ايطرز الجبال

والشمس حركَتني نوبه

وكَمت أدوّر بالشمس والملكَه فَي

ومن عبرني الفَي مسافه/ صارن أيامي محطّه ابدون ضي

وكَربن ايام الدراسه وصار جرفي ابلايه مي

ولفني بنيادم شريط وعمري بكره

ولوله طبع النهر مد ومرّه جزره

ما بقت عالأرض شجرة

ومرْه من مرّه شربت الصفنه ماي

وردت اصحه وما صحيت

إشلون أصحه؟

ومرّه من مرّه نسيت الدنيه وكحه

إشلون وكحه

ايطيب جرح الناس

كلمن نزف جرحه

آنه من تنزف اجروحي/

أهجس ابنادم يذرّي ابجرحي ملحه

كَبل وآنه ابفي صريفه

كَبل وآنه وفرحتي وكَلبي ورفيفه

جنّه عالشاطيه نلعب بالرمل

ومن فُرحنه احنه ابهوانه

صارت الجفيّه ظل

ومن كبرنه ابسد ضوانه

خضرت الدنيه سنابل

والشفايف لسه بخيالي طعمهن

وهم اكو ابنادم يمصّ اشفاف صاحبته ويمل

ولاني ناسي اشلون جابتلي الهديّه

قدّمتلي ورده حمره ومزهريّه

وجانت اتقدّملي يوميه الصبح

ورده أو سؤال

وشنهي السؤال؟

ـ انته هم اتحبّني كَد ما آنه احبّك

هاي صاحبتي جميله

جانت اتحبني واحبها

ومن يهبّ الهوه الشرجي

تهب من اجبالنه

نسمة شمال

هولندا