العنوان الأصلي للمقالة: بخصوص مسيحيي سوريا . رسالة سياسية منيحة من الشاعر الارستقراطي الأزعر جبران سعد إلى السيد سَرجي لافروف

هادا المقال هدية : إلى ديانا الجابري وبهراء حجازي و عزة ابو ربيعة وعبيدة زيتون وليلى عوض و جانسيت علي و خولة دنيا و ميادة العظم وعائشة ارناؤوط و راما نشواتي و يمان القادري ويارا نصير ،وغيرن كتار كتيييييييير ، مع حفظ الألقاب للجميع و لكل نساء بلدي سوريا .


حسب العرف والقانون الأورتودوكسي ، يُحرّم الزواج من الدم الرابع قرابةً ، لذلك وبناء عليه رح بلّش من ( قرايبك ) الشرموط جوز خالتو ل لينين : ...................... و ........... و .......... ، لك يا ....... اذا بدك تحكي بالطوائف ونسبتهن بسوريا ، نسبة المسلمين السنة 70 % ، وكل عمرهن يحترمو المسيحية ( ماعم احكي كمسيحي عم احكي كعلماني يؤمن بفصل الدين عن الدولة وبالزواج المدني بين كل ابناء سوريا وفقا للقانون السويسري والألماني والسويدي لأنو المرأة السورية ليست أقل من اي امرأة بالعالم ) ، رح ارجع كمّللك حديثي : نسبة المسلمين السنة اللي حضرتك خايف منهن 70% تقريباً ، وبيعطلو عطلة رسمية كل سنة من عشرات السنين اربع اعياد مسيحية ، عيد الميلاد وعيد راس السنة الميلادية وعيد الفصح الغربي وعيد الفصح الشرقي ، هادا ماعدا الأعراف والعادات اللي بتخللي غالبية السوريين يحتفلو بعيد الميلاد وراس السنة الميلادية كتقليد حياتي مُعاش ومرتبط بالخيالات والأعمار والحب والورد والسهر والاحتفال بين كل العائلات السورية وبكل الأجيال ، وطبعا باقي الطوائف والأقليات ( حسب مفرداتك وطريقة تفكيرك عم سمي اكتريات واقليات مو حسب تفكيري ) بتحتفل نفس الشي . عم جاوبك على قد عقلاتك ( ايها الغريب ) عن المسلمين السوريين السنة اللي انت باني رايك عنهن بناء على قناة الدنيا او كولييت خوري ( حفيدة فارس بيك الخوري قال ) او مقال ادونيس عن جبلة بجريدة الحياة ؟ ، اومثلاً رأي ادونيس بأنو معليش الخميني يطلّع العالم من الجامع بايران مع مدح إلو وتعظيموكقائد خالد وفلتة زمانو ، ومو معليش يطلعو الناس بسوريا من الجامع ، كأنو ضل شي محل يتجمعو فيه السوريين غير الجامع . لعلمك انت وادونيس وكولييت ( حرف ي مرتين ) ، اذا بيطلعو السوريين مظاهرة من مكة فالسوريين مانهن طائفيين . بقا ياريت حضرتكن بالاتحاد الروسي تقروا اللي دلقتلك ياه هون بسطل الفيسبوك ، وتتعلمو من السوريين الاحترام والمشاركة وتطلعو قرار بالاتحاد الروسي للتعطيل بعيد الفطر وعيد الأضحى وعيد راس السنة الهجرية قبل ماتجي تتفلسف على ربنا وعلى سوريا والسوريين .
وكمان اذا بدك بعطيك دروس بالجغرافيا السياسية ( الجيو سياسية اللي خبّصت عنها بآخر مؤتمر صحفي ) ، يعني : اذا بلحظة برات الزمان والمنطق ، فاقت الصبح الكرة الأرضية والكواكب والأجرام السماوية ولقوا 23 مليون سوري صاروا كلياتن مسيحيين ، فبحكم الجغرافيا السياسية ( ماغيرا اللي حكيت عنها ) مارح يقدرو ولا بأي شكل من الأشكال يعيشو اذا تخللو عن عمقن العربي اولا والاسلامي ثانيا ( العراق – السعودية - مصر - تركيا - ايران – الأردن ... ) ، هادا اذا حابب تتعلم الدرس واذا ظبطت اللحظات اللي برات الزمان والمنطق ، مع انو مافي شي برات الزمان والخيال والمنطق غير المجازر بالحولة والقبير ودرعا و و و ... . وضيف لمعلوماتك اضافة بسيطة انو الأمير طلال ابن عبد العزيز طالب وكتب علنا ليس فقط بايقاف تهجير المسيحيين خارج بلاد الشام والعالم العربي ( اللي حضرتك خايف عليهن ) ، بل بايجاد برامج ومحفزات ترجّع اللي هاجروا ،لأنو تهجير المسيحيين بينسف العروبة من سلسفيل ابوها وبيخللي الاسلام السلفي لحالو بالمنطقة مع اليهودية الصهيونية المتطرفة ، وهادا كلام علني وفيك تفوت على غوغل وتشوف المقال وفيك تطلبو من جريدة النهاراللي نشرتو ع صفحتا الأولى بمعية صاحبها غسان تويني الرجل المليء حتى الأبد بالحضارة واللي توفى مبارح ( على فكرة الأمير طلال مسلم سني وهابي من السعودية اللي مافيها ولا مسيحي سعودي الجنسية منشان التدقيق الكيميائي الفني التعبوي ) ، وكمان وكمان اذا بدك بعطيك درس تاني بالأنتروبولوجيا وخاصة فيما يتعلق بعادات الموت اللي هيي جزء اساسي من شخصية المجتمعات : الاسلام الوهابي بيمنع معرفة القبور وزيارتا بما فيها قبور الملوك ، اما بالشام فعادات زيارة القبور عند السنة السوريين ( واللي انت متدايق وخايف منهن ) هي زيارات عائلية للقبور مع عرق اخضر ( الآس ) بالعيدين الفطر والأضحى ، بقا شفلك شي حدا هالناح هالناح بالوزارة عندك بيفهم اكتر منك بالانتروبولوجيا بلكي بيشرحلك وبيفهمك ياها ، انو الاسلام متنوع ومتكيف بحسب البيئات ، وانو مابيحق لحدا من 5000 سنة ولهلق ولبعدين انو يعتدي على معتقدات الناس ويجرمهن فيها ، بما انك خايف ومرعوب علمسيحية من سنة سوريا . ولعلمك منشان الجيوسياسية تبعك ، دول الخليج كللها حافظت على الطبقة الوسطى بسوريا وعلى المسيحيين خاصة تبع بلاد الشام ، كل المسيحيين عم يشتغلو بدبي و جدة والرياض وابوظبي وام ظبي وابنهن ظبي الله يخلليهن ياه ، وماحدا اجا صوبن ومحترمين وكلهن عم يطلعو مصاري ويبعتوها لأهاليهن ويعمروا بيوت ويعلمو ولادهن ، ولاتفكر السوريين رح يصيرو اندال وينسو . وكمان اذا بدك بعطيك درس تالت بالسياسة ( وانت وزير خارجية قال ) بما انك عم تخبص وتتعامى عن مجازر أطفال الحولة والقبير ودرعا و و و الخ وعم تساوي بين اخطاء تُرتكب بكل الثورات من قبل الناس الثائرين على الظلم الممهنج والمبرمج من زماااااااااان ( تذّكر منيح البلاشفة والمناشفة وتخبيصات الثوار الروس سنة 1917 وبالطالع ) وبين عمليات مبرمجة ومنظمة يقوم بها شبيحة لديهم موارد مالية وفنية ومؤسساتية و و و والله مللينا من المسبات عليهن ، والدرس التالت اللي بدي اعطيك ياه بالسياسة سهل كتير : كل طلبات روسيا من ايام القياصرة من 200 سنة لهلق ولبعدين هيه الوصول للمياه الدافئة يعني البحر الأبيض المتوسط ، منشان ماتضل روسيا محصورة فوق بالتلج وبأسيا الوسطى ، وتبدلت روسيا من قيصرية الى شيوعية الى مافيوزية حالياً ، وماتبدل الطلب لأنو يا وزير خارجية الرئيسين بالتبادل ( بوتين وميدفيديف ) الدول بيتبدل اسما والأشخاص بيتبدلو بس مصالح الدول والأمم مابتتبدل ، بقا شوف انت وين مصلحة بلادك وكيف عم تتصرف فيها بتصريحاتك وسياساتك اللي عم تعمل عداوة شعبية وسياسية مع الناس بسوريا ماالها بلادك اي مصلحة فيها . طبعا اذا احتجت ايا درس كمان مني بالدين او الانتروبولوجيا او السياسة او الجيوسياسة ، تكرم عينك انا جاهز بس بشرط ماضر مصلحة بلدي سوريا ، و والله العظيم عم خفف حكيي معك وعليك مع انو رح طق ، بس شو بدي اعمل عم احكي سياسة و السوريين الهن مصلحة مع روسيا منشان الأسلحة ضد مغضوبة الأمم اسرائيل . بعدين وين كنت حضرتك لما المفكر الانشطاري عابر الأمم والقارات مصطفى طلاس كتب بمذكراتو ( انو المسيحيين بسوريا خونة لأنهن بأوامر من البابا بولس مدري شو العَشَر، شدوا مع رفعت الأسد ضد اخو حافظ ) ؟ و وين كنت لما ( الموظف الاستعماري ) ابو صواويخ حسن نصرلله قال ( انو ينتبهو المسيحيين بلبنان 150 الف جندي اميركي بالعراق ماقدرو يحمو المسيحيين هونيك ) على اساس صدام حسين واحمد الشلبي ومقتدى الصدر ونَوَري المالكي مسيحية كللياتن ، وبعدين نزلو نسف بكنايس العراق ومسيحييه وماحدا فتح تموعندكن باتحاد بواري الصوبيا الروسي ؟؟ طيب اذا حضرتك كوزير خارجية ماتحرك العكروت المسيحي عندك لا منشان مذكرات ابو صطيف ولامنشان ابو صواويخ وتهديداتو لمسيحيي لبنان ولامنشان نسف كنايس العراق ونسف مسيحييه ، اف ، من وين اجتك هالحرارة هلق ؟ شو بوقتا كانت بجيبتك علبة البانادول وهلق ضيعتا قام طلعت الحرارة ؟ ، وبعدين شفتللي الدستور السوري الجديد اللي حطوه جماعتك بالشام سنة 2012 كيف حاطط المسيحية درجة تانية ؟ وين كنت حضرتك وليش ما شرفت انت او ( اتحاد بواري الصوبيا الاورتودوكسي ) وحكيتو شي ؟ و وين كنت لما ماطلع للمسيحيين نسبة نواب بالبرلمان بالدورات السابقة ؟ وماكان بوقتا لا في مؤامرت خارجية ولا حمد ولا الجزيرة والسعودية ولا بريطانيا ولا اوباما ؟ كان لحالو الحكم العلماني الجمهوري عم يسرح ويمرح ويخردق قهر وفساد بالبلاد وبالعباد ، هات لنشوف نورنا ؟؟ هلق صرت حابب المسيحية ، لعمى شو حباب و درويش ، كيف حكم علماني وجمهوري ومن زماااااااااااااااااااااااااان وهيك وضع المسيحيين فيه اللي هلق حضرتك حن فؤادك عليهن فجأة ومن غامض علمو ؟؟؟. وكمان في شغلة حابب قللك عليها انو هادا اللي حط ا المسيحية درجة تانية بالدستور الو هدف اساسي واحد :من جهة انو المسلمين بسوريا متخلفين ومابيقبلوا ( الغير اوالآخر او المختلف ) بيقبلوا بس واحد مسلم رئيس جمهورية وهيك بيكون السياسي اللي حط الدستور حط كمان المسلمين السوريين درجة تانية بالشعور والتفكير الأدمي ومنعهن من حقَن الطبيعي بانتخاب ابن بلدن وعلى كيفن شو ماكان يكون الدين اللي ولدوا فيه ، ومن جهة تانية وبنفس الوقت بيكون غازل مصالح العالم الغربي الاوربي والأميركي بالاسلاموفوبيا اللي مخترعا منشان مصالحو واللي منها اختراع اسمو القاعدة وبن لادن . اذا مادارتلك هي اخر وحدة تبع الدستور ، عيدا مرة تانية وتالتة وروح اجدبها على واحد غيري مو علييّ ولا على رفقاتي علمانيي سوريا . انا بعرف جبال ومسافات التسامح اللي عمرتها النفس السورية على اعمدة جهات الأرض الأربعة ، هي قدامك تاريخ الشعر الاسلامي كللو ، لاقي متل قصيدة سعيد عقل ( المسيحي ) عن مكة اللي لحنوها الرحابنة ( المسيحيين الأعلى من كل الطوائف ) وغنتها فيروز( اللي اعلى من كل الطوائف ) دوّر من يوم الهجرة النبوييييييييييييييييييييييية لهلق ، ناطرك . في عندك كمان قصائد محمود درويش ( الأعلى من من كل الطوائف ) عن المسيح ، وفي عندك لوحات فاتح المدرس ( الأعلى من كل الطوائف ) عن المسيح ،وفي عندك عشاءات وايقونات حمود شنتوت ، وفي ابن عربي وفي المطران ميشيل الحايك ( صاحب كتاب المسيح المسلم ) وفي و في وفي .... بس ياحرام يا سوريا وأاااااااااااااخ يا بلدي يا بلد المجازر صرتي لعبة بايد الأمم الجبانة ، وصارت حياتنا المتسامحة المتآلفة النازلة ركد ع نص القلب ، وثقافتناالانسانية العالية شعريا وفنيا ، دريقة عم يتدرب عليها ( الغُزاة الجُدد ) من كل الجهات .
جبران سعد
استوكهولم العدية 9 أيار 2012