مين اللي اخترع المناسبات الدينيّة، والوطنيّة، والعائلية. بحس بغصّة كل ما أجت مناسبة، ولأنو المناسبة مرتبطة عندي بالهديّة، وكلّ مرّة بقول: رح خبّي كم ليرة للمناسبات، يخربيتها ماتخلص" المناسبات" وأنا كمان اللي بكون خبيتون بفتح عيوني الصبح وبلا خبري بروح بجيب ربطة خبز. بعدين بقول: ياالله هلق كان ضروري اليوم ناكل خبز؟

اليوم كان مخصص للغة العربيّة، وكنوع من الاحتجاج، على العرب العاربة، والمستعربة، لأنهم حرموني أسهر ع السطح، وحرمو أهلي كمان من الرّوحة ع الضيعة. له السبب رح أكتب بلغة أهلي. المناسبة هي: يوم اللغة العربية.

في مديني "السّلميّة" هي مدينة. بس أهل حماه لسا بيقولولنا ضيعتكم. هههه. أهل حماة أجو لضيعتنا من خوفون من الأسد. بس أنا موعن هيك عم أحكي. نحنا بالسلمية .منفرش ع الأرض ،وبالسهرة بتدور المتّة، ويمكن يصير عشا. قرص شنكليش، وبصله، وإبريق شاي، وفي طاولة هي عبارة عن قطعة نايلون بيفرشوها ع الأرض. هلق في كتير ناس عندها غرف سفرة. بس القله بتستعملها. جينات بقا!

أنا ما كنت شارك بشرب المتة. هديك الأيّام ماكنت أحبها. بس كنت انبسط بالسهرة عند بيت خيي ع السطح، بتمنى ترجع هديك الأيام منشان أسهر للصّبح

لأني بهداك الوقت. كنت أقعد عالأرض. يعني على فرشة حولها مخدات، وبعدين مبعرف شو يصير معي. ماحس ع حالي للصّبح. نام بلا خبري، ويغطوني. وما أعرف شو صار. بس لمن أفيق: آكل من هون خيارة، ومن هون حبّة عنب. كلو من خيرات الأرض. بس حتى لو رحت مابقا في خير ولا أرض.

بيرجع مرجوعنا للمتّة. متل ماقلتلكون. أنا ما كنت متعلقة فيها. بس هلق ندمانة ليش ما كنت حبها.قرّرت أعتذر منها، وعوض اللي فات. ناقصّني مصاصة متة.اشتريت المتة، وبقيت المصاصة، ووقف العالم بوجهي ولم يؤمنها.

كل يوم الصبح.هيك بصفُن ب هالدنيا، وبقّول: أخ بس لو عندي مصاصة!

هلق الدنيا ضيقة لو ماعندك مصّاصة

بتعرفو شو عم يخطر ع بالي: هلق لا تضحكو عليي

بدي روح عجنيف. عم تضحكوا مو؟

ما عم تضحكوا. لأنو مافي حدا أحسن من حدا.

بس قولتكون بنضم للمعارضة ولا للدولة؟

عم تقولوا: المعارضة ما تشرب متة

لا. موصح. الكل بيشرب متّة. هي بروتكول لمجاملة الحكومة.

وأحيانا بيسكروا منها. . .

بس أنا راحت عليي.

صرت متل المضيع جحشة خالتو

وحتى بجنيف ما بيقبلوني

مع أنو مارح يتكلفوا إلا حق مشوار الطريق

لأنو بعضون بيحكي سكايبي مع رفيقة بيقلو وقع حضور من بدالي، وجبلي المستحقات، ولما بيسألوه مع مين ع متحكي. بيقلهون: مع ناشط ع الأرض

قرد. شفتو هالسالفة! عم يقولو: فكت ياعرب!

أوباما عم يقول: خلصت

عزا معقول هالحكي؟